2018年12月8日星期六

楊sir生日

有位中學同學今日生日,喺Whatsapp羣組内有個同學發訊恭賀一番後,其他同學紛紛祝賀,我就先不發訊,因為金美頑童拆字聯癮起,想用佢個名套用拆字方式創作後再發放。話說哩位同學小時喺同一屋邨住,但到中學同派去同一中學後先認識,到分派去同一理科班先相熟。佢係運動健將,而我就唔係,性恪迴異,但大家亦有一段時間與一班同學鑽研橋牌,間唔中會成為partner,當年考完會考等放榜就組隊日打夜打。而且入讀港大第一年,同另一個同學都入唔到宿舍,喺西環租咗一間只百多尺嘅房間同住,空間有限而且又要慳錢,唯有自製三層碌架床同書枱,依家諗記都不敢想像可以做到。

終於到晚上諗到以下聯句,喺羣組發放。
木易彎志不朽
人建樹成就人
言成器榮耀神
女子孝敬相親

原本我只作頭三句,概括我對佢嘅觀感,亦讚賞佢以教育為終身職業,作育英才,愛主愛人。最後一句係廖sir閱後覺得聯對要成偶數先合,所以從佢添加嘅一句略改而成,有見佢有對子女有感而發,祝福佢一家快快樂樂,同感主恩。

沒有留言 :

發佈留言