2018年9月1日星期六

白蠟蟲●雖死猶生

由細到大都對自然界嘅多樣性生態特别有興趣,所以鐘意睇紀錄片,尤其係關於海洋同昆蟲。最近喺MyTV Super盒子睇咗一集大陸攝製嘅作品——“白蠟傳奇”,内容講述一種叫“白蠟蟲”,第一次聽聞哩種昆蟲,名字由來於佢成長過程中產生嘅生物蠟,有别放現今由石油副產品提煉而成嘅化學蠟,古時中國收集哩種蟲蠟做蠟燭及封存藥丸之用。睇完哩集紀錄片,眼界大開,感到大自然世界嘅奇妙。

話説哩昆蟲奇在雌雄異體,有别於其他昆蟲嘅成長發展,由卵到幼蟲時期,雌雄外型基本一樣,雄蟲會經過四個階段(卵、幼蟲、蛹、成蟲),但雌蟲只有三個階段(卵、若蟲、成蟲),前者為“完全變態”,後者為“不完全變態”,係昆蟲界中好少見。通常昆蟲成為成蟲後,雌雄外型最大分别只在於體型、色彩及花紋,但唔會相差得太多,仍然尚可配對為同一種昆蟲。白蠟蟲就唔同啦,以上各方面雌雄相差太遠,感覺上似係兩種唔同生物。白蠟只有雄蟲進入“蛹”階段時吸食白蠟樹嘅樹汁後分泌蠟質而成,作用為保護蟲身重組轉化為成蟲之用。一大羣聚集一起吐蠟作蛹,因為今到樹枝包上一層厚厚白色嘅蠟質,所以“蠟”字嘅部首係“蟲”而唔係“火”。

對於蟲蠟並唔陌生,因為早幾年開始租田種植時遇過兩種蟲身帶有白色蠟質嘅昆蟲幼蟲(粉介蟲、廣翅蠟蟬),係十分討厭嘅害蟲,一羣羣依附喺喺啲農作物之上,用殺蟲劑無乜作用,因為身上嘅蠟層阻隔咗啲殺蟲劑,用水又唔得,因為蠟層防水;廣翅蠟蟬比粉介蟲更討厭,因為蠟蟬會跳,仲跳得又快又遠。

最後以一巧字聯作結,概括一吓白蠟蟲嘅奇怪成長過程。
上聯:固步自封蠟蟲
下聯:雌雄易辨臘月
蠟從蟲,臘從月(肉),臘月為十二月。上下聯嘅重點就係“團聚”,雌雄白臘蟲各自用唔同方式轉化自己,犧牲自己,最終為要團聚,為要產生下一代。

參考

沒有留言 :

發佈留言