2018年7月27日星期五

生離●死別

最近經MyTV Super睇完另一套四年前嘅舊劇“愛我請留言”,係繼“師父·明白了”後原班台前幕後嘅另一創作,由古代背景轉移為現代,仍屬愛情劇集一類,多方面有着相同套路,但減低咗一啲禪學嘅味道。今次嘅現代愛情故事乘着近十年八載嘅一眾即時通訊軟件嘅流行而發展,人與人之間本應更近,但反而似更遠,只係速度更快更即時。

今次嘅主題圍繞“生離死别”,相對於“師父·明白了”講慨“因果”來得貼地,因為係人生不缺嘅遭遇,有生就有死,最痛苦係别離所带來嘅不安、不捨、無力、無助……無論對當事人同關連嘅人都有唔同程度嘅影響。“師父·明白了”講嘅“因果”係近於靈性/思想嘅層面,“愛我請留言”講嘅“生離死别”就屬於感情嘅層面,比較低咗一層。

故事由兩位男女主角(仍為黃浩然、黃翠如,分别飾演樂天送、茹初見,兩個名都有含義)喺同一日(20090909)各自遭遇到自己至親嘅突然離去,咁大衝擊下心理上接受唔到,正當哩段艱難時期,係情感脆弱之時,所以加速咗男女感情嘅發展。但相處耐咗就發覺心底裏有所壓抑、逃避,最終各自分開,兩個主角回復單身後,亦因為多咗見面而互相扶持、提點,但其實兩個人喺以上所指同一日生活發生巨變、最失落之時已相遇,只是未有相愛。世事難料,兜兜轉轉又走埋一起,各自有自己嘅包袱,未能盡愛。當飽嘗死别之苦後,更覺相知相愛嘅可貴,點解仍要生離呢?!

除咗哩條主線,仲有其他世俗眼光唔睇好嘅情侣,各有難處,但全因一個“情”字而變得可貴。哩套劇嘅成功同比“師父·明白了”更可觀,我覺得係因較人性化,係活生生嘅生活氣息。當然今次各演員派啱角色,亦加插唔少有隱喻嘅信息作為點綴,成就整套劇睇得舒服及投入。另外有大量好聽嘅歌曲穿插喺每集當中亦唔錯。

最後以兩位主角名字同“生離死別”作為主旨而作咗以下兩句作結。
恰如
終相

後記:
誠如我所寫嘅另一篇blog(「夬」字聯)——人生於世,匆匆幾十年,滿載無數快事、缺失、訣別、抉擇……=_=

沒有留言 :

發佈留言