2018年6月18日星期一

端午西水釣一番

日期:2018-6-18,農曆五月初五,星期一
地點:馬灣一帶
開始時間:9:00
結束時間:17:00

全日漁穫,以黃釘、沙鱲為主

今局毒王早一個月前已約,仲同艇家梁生確認咗,上星期喺“金美爆釣團”發文時,我先恍然大悟,好彩釣局係端午節正日假期,唔駛另行請假。因早一排家事纏身,都有好耐無出釣,所以釣魚工具無乜補給,特別係鉛,而且上一局又有支魚竿損毀,俾咗揪哥維修都未攞番,只好當日買番啲。另外哩排買蝦做餌都唔多易,毒王自告奮勇先行購買再入深井會合,大家約好深井鴻記食早餐等埋先上船,今局除咗毒王,仲有Ben同Mike,Ben就同佢釣過幾次,Mike就無乜印象。

梁太上嘅石蚌

出釣當日交通一切順利,好快就去到深井,食飽早餐買埋個北菇雞飯做午餐就行出碼頭,但未見梁生艇,打電話去就梁太接,原來今日佢接我哋,一跳上船就快速融離碼頭。第一釣點係大嶼山近橋一處,今日全日天唔多曬,但風有時幾大,總體而言不算辛苦。第一條魚由我釣上,感到條魚食餌唔係搶食都估到八分係乜,抽佢上艇原來真係沙鱲,手板咁大。之後向迪士尼公園方向駛去,但只遠遠望到,又無再去大細交椅洲附近釣,但尚算有啲魚仔玩吓啦。除咗手板沙鱲外,最多係黃釘,唔難釣但唔會好大。

又係梁太上嘅細鱗

其間亦有少量石狗釣到,但始終已過石狗季節,數量同重量都唔會大,當過手癮咁話啦。全程我算維持住上到魚,都係黃釘同沙鱲一半半啦。其餘Ben哥坐喺我後面,同梁太同一邊,所以整體比毒王同Mike坐另一邊上魚多啲,當然梁太喺船家,喺釣場最有利嘅位就梗係佢啦,而且又有經驗,所以全日兩條比較大嘅魚都係佢釣到,分別係細鱗同紅鮋。另外Mike坐喺我隔離,比較新手,上魚唔多,但亦上到條良型沙鯭,好玩好食,但佢有次條絲打埋車葉,反應唔到就咁拉斷支竿,仲俾條絲切親條手指添,好彩唔係好深。反而毒王坐喺Mike後,上魚唔多,唔知係咪前日喺西貢龍宮已釣咗半日,體力差啲哩。

Mike都上番條上枱魚——沙鯭

時近五點就駛返去深井碼頭,撈咗啲魚先嚟個大合照,就分魚上岸,我只攞咗批黃釘同沙鱲,諗住沙鱲留為煎香整鱲魚湯烏冬,啲黃釘就釣咗Maria差唔多俾哂佢。
全日航行track,逆時針而行

我釣嘅一啲魚,以黃釘同沙鱲為主

第一次釣到哩種魚叫“蠟燭”,細陳話哩排都多釣到

沒有留言 :

發佈留言