2018年6月3日星期日

2018郵輪之旅——科技篇

有兩年前初上郵輪嘅經驗,而且今次仍然搭上同一郵輪公司但更新嘅船隻,所以大部份嘅技術及應用今次仍可套用,但始終兩年喺科技領域唔係短時間,以下會沿用上篇blog嘅格式分成“器材篇”同“應用篇”,只主力帶出今次嘅分別同改進之處,大家可先參考我上一篇有個概略。

郵輪係海上嘅巨無霸航行工具,一眾對外對內嘅電訊儀器色色俱全,其中近船尾一列向天嘅衛星天線不可或缺。

我會每一個項目前用以下標記,方便理解。
●——舊項目,同前篇大致相同
○——舊項目,但今次無應用
★——新項目

器材篇
●手機——今次仍然以手機作為主要多功能工具,我部主手機已一年前轉用咗部雙面王,一面普通彩屏,背面係e-ink屏,方便睇書同喺戶外陽光下使用。公司手機仍然係兩年前剛轉去嘅Samsung Galaxy S7,主要用作做公司嘢,例如email,亦作拍攝之用,因為始終部雙面王主力放喺電子閱讀之用。老婆部手機就升級咗去LG V30+,有雙後置鏡頭,賣點係廣角鏡,對於影風景好有幫助。因三部手機同為Android,資料互轉互換都方便。

●電器接頭——今次沿用同一組合,主要係萬用國際電器接頭配個三位拖板,但因今次嘅房間比上次升級咗,面積大咗而且多咗電制位同USB叉電位,所以用電更加方便,唔駛諗埋要用網上提供嘅方法——利用電視機嘅USB位作為叉電之用。

●藍芽音箱——今次仍然帶備上次同樣嘅藍芽音箱,主要用作播放音樂或收聽電台之用。但今次比上次少用,主要係上次因上網速度唔足夠收看視頻,但今次因有MyTV Super手機app收看直播或重播,而且另帶一個盒子,咁就多時間轉睇視頻喇。

○MHL線——依家市面嘅手機或平板都已轉用各式無線方法連接電視,所以MHL線帶上船都無用。但喺郵輪上要連上電視就唔係咁直接、簡單,方法可參照下面嘅步驟。

●流動電源(俗稱“尿袋”)——今次都有帶尿袋,只作不時之需,但始終無用過,一嚟喺船上用電唔算多,而且週不時返房就可快叉一陣呢。上岸就要直踩,直至再上船房上,但電力仍然足夠。

●藍牙手掣——今次仍用上次同一隻藍牙手掣,因佢夠細隻,上次只諗住用作手機自拍之用,但今次另有用途。因部手機有無線投影上電視功能,咁就可用個房內大電視作顯示,用部手機預先裝哂嘅家用遊戲機模擬器app同ROM就可玩多種細個玩過嘅電子遊戲,例如Mario Brothers。用藍牙手掣玩哩啲遊戲就有更好嘅體驗喇。

○自拍神棍——今次無帶自拍神棍,因上次船上或上岸都唔多用,所以今次唔帶就慳得一樣得一樣。

★電視盒子——兩年多前續約家居寬頻時送咗個樂視盒子,但哩間嘢喺香港嘅業務已清盆,剩低個盒子已連唔到樂視嘅服務。我就自行root咗佢,再裝上一啲視頻、遊戲app,咁就可直出電視嚟睇戲睇劇等各種娛樂之用。因可直出電視,瞓喺床上就好方便,但前題係要能夠選到個AV輸入先得,方法可參考以下。
用部“雙面王”內置嘅紅外線就可以好輕易切換各種AV輸入,以上我就用條hdmi線連接部樂視盒子上電視,只要選啱連接嘅hdmi埠就得。

★紅外線遙控器——船上每間房都有電視——Samsung智能電視,可提供hdmi或Smart View,分別作為有線及無線連線顯示之用,前者係俾部樂視盒子,後者係俾手機。兩種連接唔係新鮮事,但船上提供嘅遙控器係無AV in一鍵,以防客人用自攜器材連接。網上有教可自帶一個Samsung電視遙控器或萬用學習遙控器就搞掂,我就更簡單,用部雙面王手機就得,因佢有紅外線同自家app,有齊各廠嘅紅外線資料碼。
有次活動完返房途中,特意用個wifi app睇吓除咗船上提供嘅內聯網wifi(royal-wifi & royal-crew)外仲有乜wifi基站或應用,就見到幾個Samsung Smart View嘅wifi([TV]Samsung LED40 & [TV]Samsung LED48),即係有幾間房都有用自己方法喺部電視起動到哩個功能。

應用篇
●互聯網
今次郵輪上嘅多方科技應用仍然以互聯網為主要層面,始終打通天地線就萬事皆可能。估計今次隻船2016年先首航,比兩年前乘搭嗰隻翻新船為新,所以上網速度同價錢都有提升。相對兩年前每日US$10,今次要US$18,價錢接近成一倍,但相對於各大電訊公司嘅每日漫游價目,其實都要近百元港幣,除非你另行購買當地上網卡,咁就會平得多。但郵輪耍用衛星上網,係獨市生意,所以都要購買船上全程船上衛星上網方案,好彩今次公司可代資哩筆費用,因為我喺船上都要做啲公司嘢,例如睇電郵,有時仲要打電話呢。

今次喺船上作過多次網速測試,無論速度同延遲都好咗,網速可去到22Mbps,相對兩年前1Mbps快咗唔到,就似初代寬頻同打電話上網嘅分別;另外訊號延遲就由兩年前嘅1000ms(1 sec)減少到近500ms(0.5 sec),減幅近一半。所以今次對一啲要求高網速、低延遲嘅應用應該使用上更好,例如視頻串流同話音應用。但唔知乜原因,今次連線無上次咁穩定,唔係wifi層面,而係互聯網方面。

全程十日九晚船程,四部裝置(三部手機,一部電視盒子)合共用咗6GB嘅上網數據,比兩年前嘅3GB多咗一倍,主要係視頻應用比音頻需要更大數據用量。

左:雙面王作為主機直接連上船上互聯網wifi網速
中:另一部手機經雙面王嘅wifi bridge連線網速
右:用藍牙分享互聯網後嘅網速

●語音通訊
①對外通訊
依家大部份手機同網絡商已提供Wifi call嘅服務,但仍然要無離開香港先得。但今次無論係公司手機(Samsung Galaxy 7)行Smartone網絡用Wifi call,或者私人手機(雙面王)行CSL網絡用Kingking call,打出電話唔係次次都得。最奇怪係有時唔駛vpn返屋企都打到Wifi call,又或者Kingking只可打18503(香港查詢天氣熱線),但打唔到俾其他人。但今次通話質素同延遲已不錯啦。當然Whatsapp call始終有保證得多。
今次公司手機同網絡已全面支持Wifi call。

②船内通訊
上次喺船上已開始硏究利用船上wifi內聯網作為自家通訊嘅渠道,今次臨近上船前已開始試驗一啲純wifi網絡(應該係wifi內聯網)作為語音及文字嘅通訊,最終選定Talkie,因佢最為穩定同功能強大。同時又用部TP-LINK TL-MR3040重灌成Openwrt,作為船上嘅通訊server,其中最主要行個小型proxy server,以便只要手機連上船上內聯網wifi就可經個proxy server上網,無需限制距離嘅問題。離港前試過一切正常,但上到船就無用武之地,原因係船上嘅wifi實行LAN client isolation,咁起部server都無用。

但船內內聯網通訊係有實際需要,因為隻船太大,我同老婆有時又唔係一起行動,例如老婆去咗跳舞或運動,而我就去咗睇電影或曬太陽。所以今次我哋兩部手機買咗船公司提供嘅全程船內通訊(語音及文字)服務,每部手機都係US$7.95,裝咗佢個專屬app(Royal iQ)就得,實在有用,而且質素唔差架,唯一係見唔到在線狀況。除咗手機可互打之外,亦可作內綫電話,打去房內電話或船上工作部門添。今次船上仍見個別人仕小量使用對講機,但始終受船上金屬間隔阻擋,同層通訊尚可,唔同樓層就基本唔通,而且用時要公開播放同收音,都有一定嘅滋擾,所以我會推薦購買船公司嘅船上通訊服務好過,始終只係有限錢囉。

最後係泊喺日本港口後上岸嘅通訊安排,我就無專登走去深水埗購買超平日本上網卡,而係去咗聯通買張HK$138嘅七日上網卡。
雖然買咗日本當地上網卡,我放落老婆部LG V30+,再經wifi分享俾我上網,但有時大家唔喺一齊,互相通訊就麻煩喇。例如到咗長崎,前去上次食過好食嘅一間日本餐廳,但今次撞啱當地週末,要排隊等位,咁我哋就分頭行事,我留低等位,老婆爭取時間去血拼,當我入到座就要通知老婆。但因為大家分開行動,我用唔到老婆分享出嚟嘅上網途徑……唔駛怕,日本各處都有提供免費wifi上網,但基於安全問題就唔好亂上啦。頑童如我就梗有方法嚟保障私隱啦,咪就係連返屋企個vpn server就搞掂哂喇。所以有個家用vpn守門口係有必要嘅,因為喺香港上啲免費wifi hotspot都可套用。

●資訊娛樂篇
除咗離開房去各式場所睇表演外,聽網上電台就係最簡單嘅資訊來源。因為今次上網速度快咗,令到上次唔可能嘅娛樂都變得可能。例如MyTV Super,我量度過佢對唔同畫質嘅網速要求如下:
低質 126KB/s
中質 200KB/s
高貨 300KB/s

①電視視頻
今次仍有聽網上電台,但更多時係睇各樣視頻,計有以下:
MyTV Super
直播即選即睇,完全無難度,我主要係用作睇新聞。但如果要睇重播就要先連上屋企個vpn,等佢當你無離開過香港先得。為防上網速度有時大上大落,有套追開嘅日劇我會離境前先行下載,因有五日離線觀看時限,已足夠了。
房內觀看CCTVB新聞台效果,用最低傳輸量模式已有不錯效果。

樂視盒子
用作網上視頻串流或媒體播放都有唔錯嘅較果。

②電玩遊戲
我有部手機一早裝定一啲家庭遊戲機嘅模擬器,再下載一批兒時玩過嘅遊戲ROM,今次再經電視嘅Smart View作為無線投屏,加埋個小巧嘅藍牙手制,就可重拾兒時打機嘅樂趣喇。


●資料交換
今次唔多要同唔同手機互相交換資料,但因為用wifi而唔係藍牙嚟連接上互聯網,所以直接用wifi配合ES Explorer就可快速互傳檔案,更加方便。

沒有留言 :

發佈留言