2018年5月27日星期日

莧菜●莧米

年頭續約寬頻時送咗個CCTVB嘅MyTV Super盒子,咁就可以自主隨時隨地睇番一啲新舊劇集同節目,其中世界各地嘅紀錄片係我其中最喜愛嘅一項。最近睇咗一個講述人類食用穀物嘅歷史——古穀今食,好有知識性同趣味,其中第三種講嘅穀物叫“莧米”,見到個“莧”字就諗哩種穀物同“莧菜”有無關系呢……原來莧米就係莧菜結出嘅種子。只係我哋平時只食用菜葉同菜梗,而西方幾千年前已有食用,但主要係作為穀物而食。

點解諗起“莧菜”?係因為莧菜係我由細到大已喜歡嘅蔬菜,對佢嘅香味同口感都情有獨鍾。話說細個屋企會買莧菜做餸,印象中多數係紅莧,但有幾次因打風而至街市無乜蔬菜可買,或價錢好貴,所以食餐菜都難。阿爸就話去樓下公園或山處採摘馬屎莧做菜,最初都有疑惑食唔食得架?又或者平時都唔見人採集嚟食嘅!就膽粗粗跟住阿爸去採摘,從一叢叢野草當中辨認出馬屎莧並不困難,但採摘合食用嘅嫩枝嫩葉就要一啲經驗喇。好彩馬屎莧係好粗生,好多時係一叢叢而生,應該係佢自然結穗四週落地擴展而成。

從電視節目中得知“莧米”嘅營養價值好高,比其他穀物優勝,等我搵啲嚟食吓先。

特意作咗以下拆字聯概括一吓我對“莧菜”嘅特質讚賞。
叢萬綠不顯
根脾性實精
莧=草+見
菜=草+采

沒有留言 :

發佈留言