2015年12月7日星期一

蕃薯種植

種植時間:七月頭至十二月頭
種植方法:番薯藤
收成:一堆番薯仔

番薯由細食到大,細個時都用盆種過,唔記得有乜收成。今次用咗差唔多半塊田同五個月時間嚟種,係因為亞媽食嘅日本番薯發咗芽,咁就不如等佢生長啲割藤嚟種,所以七月頭就俾咗五六條藤細佬種落田。

花咗半塊田同五個月,只收到咁多番薯

番薯個名有個番字就知係外來物種,因為粗生又易於收藏,所以戰時係走難必備之物。番薯細個時俾我嘅印象係黃皮黃肉,加薑嚟煲成番薯糖水,冬天食就最啱,食完當堂成身暖哂,到依家都有時買定幾個放喺屋企守門口,就算放耐咗標出芽都可食用,薯仔就唔得啦。煲番薯糖水好簡單,但有一招亞媽教落沿用至今,就係要用切絲瓜咁嘅滾刀方法,但每刀唔切斷,切入後扭刀撐爆成一塊塊不規則切面嘅番薯塊,大細可因人而異,我諗咁做係要增加切面面積,從而令番薯快熟同容易食用。如果你唔想自己煲,我介紹你去佐敦佳佳甜品食佢嘅勁薑番薯糖水,其他中式傳統甜品都好有水準架。

另一種冬天啱食嘅番薯食品係焗番薯,自己去野外燒烤都會用錫紙包住放喺炭邊嚟焗,但始終唔及街上用個大鐵筒放炭嚟焗嘅香甜,冬天買一個焗番薯食有多重享受,一嚟熱辣辣可以暖手,二嚟食落肚又暖立立。講到焗番薯就不可不提臺灣嘅烤地瓜,有次去臺灣旅行食過一檔,細細粒,無香港嘅咁大,剛好當零食食用,又香又甜,佢仲印埋卡片方便訂購添,所以飛返香港前又買咗兩盒做手信。臺灣嘅地瓜種植好專業,仲有唔少自家或引入嘅品種。以前睇過一本自傳叫“乞丐囝仔”,主人翁賴東進出生喺一個乞丐家庭,童年居無定所,食無飽足,仲要行乞照顧一家上下,有餐地瓜薟食已算很好;但佢無自我放棄,仲自學有成,終於成為十大傑出青年。我極力推薦閲讀,特別適合青少年,學習逆境自強,幸福並唔係必然架。

五個月種植期嘅進程

講番種番薯,網上資料話番薯要100-120日嘅生長期,七月頭插啲番薯藤落田正值夏天,番薯苗種得比較疏,諗住預留一定嘅空間俾啲藤同葉生長,所以塊田無遮無擋而變得好乾。因此又種粟米嚟覆蓋同抓住啲泥,但今批粟米發苗不佳,最終被移除。到八月見生多咗葉就無乜理佢,直到到十月見塊地已被番薯葉遮哂。網上資料話如果食番薯葉就任憑啲枝節生出嚟嘅根入地,但如果要結番薯就要抜離開泥土,只留近插技頭段幾節有根落地,其餘所有藤互相疊起唔接觸泥土。哩次整理啲藤嘅時候,唔覺意拉起咗一整條藤,俾我發覺最初插落泥定植嘅藤頭開始有根脹大結緊番薯;咁係一個好嘅跡象,即刻埋番個藤頭入泥,等佢繼續生長。如是者又過多一個月到十一月,就見開始有花開,花型花色十足牽牛花一樣,而且越開越多。番薯花我喺網上是過,並不陌生,但一次見咁多朵就第一次。有農友行過見到都問係咪牽牛花,當知道係番薯花就好驚奇。農主仲話都唔知我係種花定種薯。•﹏•

番薯花唔同嘅型態:無論花型同花色都成朵牽牛花,因為大家都係旋花科

番薯藤頭嘅根脹起結成番薯

到十二月頭要放埋今年嘅年假,又見番薯已種五個月,夠期收割,就約細佬搞局早農午漁,逍遙一日。朝早落田就先搵其中一個藤頭略略掘起啲泥,睇吓有無番薯結到先。小心奕奕撥開啲泥,見有一塊紫色嘅番薯斜插入泥,心裏一喜。為咗方便採收,我吔先剪斷啲藤頭,清哂啲藤同葉,塊田又回復光禿禿。之後就用摌掘走藤頭附近嘅泥,好似考古發掘咁起出啲番薯。每每見到有些少紫色嘅根露出,都諗下面一定蔵有一個唔細嘅番薯,但次次都失望。最終收集到嘅係一堆好細嘅番薯仔,全部上繳俾亞媽。

好似考古發掘起出嚟嘅番薯

今次花半塊田空間同五個月時間只收咁少番薯,十分唔化算。農主話番薯好食肥,而且日本番薯生得唔大,下次要種可揀雞蛋黃品種種。但我同細佬嘅共同意見都係唔再種喇,今次當攞個經驗。

後記:佳佳甜品因為《米芝蓮指南香港澳門》推介而俾業主狂加租,好彩唔係結業,而係轉租其他舖。哩類事件已發生唔少次,所以“米芝蓮”應該叫“咪誅連”就真。(ㅎ‸ㅎ)

沒有留言 :

發佈留言