2015年4月19日星期日

無花果插枝

種植時間:二月頭催根,四月中落盆
種植方法:兩年枝條插枝
收成:未知

自從上年自行收集無花果種子發苗後,已知實生苗要出果都要三兩年時間,所以種嚟都只係為咗觀察。直至二月頭見睇開一個本地種植討論區有混種無花果枝條義賣,$25有六條唔同品種,即刻買咗兩份,一份係揪哥買,我份就有一枝俾咗處長試種。

買番嚟嘅枝條狀態良好


經過兩個半月,枝條相繼爆根落盆,全部插生


個網上義賣農友好有心,枝條係新鮮剪出嚟,仲已做頂頭封臘再加濕報紙包裝,交收之時啲枝條維持喺好好嘅狀態,而且每支枝幹上寫上品種名稱添,如果唔係就都唔知邊支打邊支。同時要插五個品種嘅枝條對我嚟都係一種挑戰,因為上次揪哥俾我嘅枝條我都插唔生。見今次買嘅枝條係兩年枝又咁好狀態,同時春天天氣係發芽好時機,心中就有一團火。立即上網睇多啲無花果發根出芽秘技,最終決定用密實袋催根方法,先將枝條噴濕,再用濕紙包住放喺一個密實袋內,成個袋就放係陰暗處。其實五花八門嘅方法都係同一原理——維持高濕度。我揀咗哩個方法係因為材料易搵,容易觀察,處理又方便。其間處長就將佢嗰枝用插水法生根,而揪哥最有經驗就採用泥沙直插方法。正所謂八仙過海,各顯神通,大家交流吓各自嘅心得同進展,幾好玩架。

密實袋催根法

個密實袋每日都會開一開嚟換氣,但唔駛乜專登噴水,因為密實袋能保濕。一星期後揭開啲濕紙睇睇,見啲枝條普遍有唔同程度嘅白點,特别係圍繞的節眼度,用手指抹吓就確定唔係發霉,上網睇過先知係發根迹象。因為未正式出根,所以放番入濕紙再催根多陣。又過一個星期,連無俾濕紙蓋住嘅枝條上部都有白色根點,有啲枝仲出啲青綠色葉芽添。見進展唔錯,所以維持咁様催根。

一星期後已出唔同程度嘅白色根芽

到第三個星期後,仍然一條根都未見,咁就要諗新方法,但維持整條枝條喺高濕度係重要一環。諗到最終啲根都係生喺泥中,咁就不如開始插枝。見網上推介用啲上闊下窄嘅凍飲軟身透明膠杯放沙嚟插枝,好處係透明杯身方便觀察生根情況,如果見到杯身滿佈根絲嘅爆恨時,因為杯係軟身而且上闊下窄,咁就將成棵無花果苗移去種落盆容易得多又唔傷根喇。但時間倉促,收集唔到哩類凍飲杯,見手頭有一啲軟身膠水樽,就切咗個頂部嚟用,為咗方便爆根時拿出棵苗,就諗到先將個樽用較剪由頂向底剪成三瓣,但會用橡筋箍番成一個樽型。插枝嘅沙泥就係用黑泥同沙以等份撈埋而成,沙係喺五金店買咗五斤裝修用嘅沙,但先得浸水幾日去除鹹味。啲撈出嚟嘅沙唔需要有任何肥料,因為只係提供一個有利生根嘅媒體就夠喇,就係咁每支枝條插落一樽沙度,而且會灌入足夠嘅水令到全樽沙泥濕透,但只做頭一次,之後見泥面乾先再淋少少水。為要保持啲枝條喺一個高濕度環境,特别用幾張透明膠片整咗個罩作為一個小型溫室嚟放哂沙樽入去,整個溫室仍然放喺無太陽直照嘅角落,每日都會噴濕啲枝條以便發根發芽。

自製小型溫室

五支無花果枝其中四支喺一個月內相繼爆根,咁就可以進入下一步,將啲爆根枝條由樽移種落盆,仲可以見少少陽光添,但仍要每日噴濕啲枝,從而有利出芽出葉。其實個别枝條會先出葉再爆根,例如支新彊早黃,但啲葉芽見有新葉發展唔夠一日就枯咗,連續幾次都係咁,百思不得其解,最後諗到哩隻品種原產新彊,當地天氣乾燥,估計啲葉唔耐濕,所以將佢移離個小型溫室後啲葉就生長正常喇。

新彊早黃葉芽估計唔耐濕,放喺溫室至先大已燶

當四支枝條爆根移盆後都生出或多或少嘅葉時,支“波爾多”仲未見有生根迹象,但有啲小葉長已出嚟,即係未死啦。終於忍唔住由泥拎出嚟睇睇,表皮仍然滿佈白色嘅根芽,竟然一條根都無,再睇睇條枝嘅底部,發覺係中通,仲有成一寸深,應該係蛀咗……咁就諗番哩支插沙樽時候因為爭啲沙,就放咗少少舊泥,應該係啲舊泥有小蟲蛀咗條枝條啦。所以插枝直係要用新泥,以防有菌有蟲。

今次係我第一次做無花果插枝,有賴合適嘅天氣、網上啲資訊同前人嘅寶貴經驗、枝條提供者嘅心機,總算係成功插生五支不種品種嘅無花果枝成苗,對插枝嘅技術已有一定程度嘅掌握(網上資料話百份之八十嘅植物可以做插枝),亦係繼種子育苗後另一植物繁殖技術嘅提昇,之後仲有高壓、接枝、嫁接……有排學有排實習呢。

亞當:需2星期爆根落盆

美利亞:需3星期爆根落盆

新彊早黃:需3.5星期爆根落盆

豐產黃:需5.5星期爆根落盆

波爾多:需6.5星期爆根落盆

沒有留言 :

發佈留言