2015年4月2日星期四

欣澳扒釣日

日期:2015-4-2,農曆二月十四日,星期四
地點:欣澳
開始時間:11:00
結束時間:18:30

同揪哥、處長有搵吓啲地方可租艇扒吓釣吓,之前去汀九係第一站,都玩過兩次,今次轉咗場地,不過仍然你西水,比較方便大家,終於喺復活節長假期放多一日假去欣澳一試。以前係叫陰澳,有一排排木椿嚟架起啲木材,欣澳係起咗地鐵後起嘅名,英文叫Sunny Bay,新舊名一陽一陰,幾趣怪。

由欣澳站沿住石堤步行入村在三十分鐘內


今朝約喺青衣地鐵等埋先,嗰度有間唐記點心可以買到啲熱辣辣嘅點心、盅頭飯、糯米雞做早餐同午餐實在係唔錯。之後搭一個站就去到欣澳,雖然係平日但列車好多乘客,因為大部份係再轉搭專車去老鼠樂園吖嘛。到欣澳後落車向石堤而去,出閘先知一個站要成11蚊,真係老鼠樂園乜都貴,但我哋唔係去個度喎!

欣澳步兵團

沿住石堤要行半個鐘先去到租艇嘅一個小村,其實就喺個內灣嘅對岸,沿途終于見到網上講以前嘅釣魚勝地——一排排嘅木椿,但已無哂啲木材同少咗好多木椿。入到條村只見沙灘旁有幾戶人家,問明後搵到租艇嘅一戶,只見有個菲律賓傭工叫出一個滿頭白髮嘅婆婆,哩條村都係只得一班老人家留守,各戶都有外傭照顧起居飲食。個婆婆係客家人,只得揪哥同佢用客家話講得掂,原來係一百蚊租一日,一艇只可坐兩人(汀九租艇都係咁講,但我哋三人坐又無問題),仲要4pm就交艇,又唔可以出個內灣。無法啦,一場嚟到都要租嚟玩吓架,咁就租咗兩隻艇,揪哥一艇,我同處長另一艇,個內灣風平浪靜,扒出去都唔難。

村內沙灘一角

當時已經係11am,要爭取時間釣魚,就咁扒到去最近一條木椿試釣,水唔深又無乜魚訊,之後續步向對岸嗰條剛步行入嚟嘅石堤而去,扒吓釣吓,但我因為要同時用電話處理公司事務,所以有時都要投竿後就置竿……就係一次我寫完email後收絲,竟然收上一條良型牛鰍。
如事者一直向石堤推進,越近石堤魚訊越多,大家都為之一振,但都只上到一啲梳羅、林哥嘅魚仔,我就幸運啲,俾我又上多條更大嘅牛鰍同沙鑽。見時間無多就經另一邊兜個圈扒返埋沙灘,中途又再釣吓,但已無乜進帳。

揪哥扒艇英姿

交完艇後見仲有啲餌又時間尚早,正諗緊再去邊度釣吓,客家婆婆就話可以去個碼頭仔一試,話早前好多人嚟釣鱸魚,有釣友釣咗好多,仲俾咗啲佢囇鹹魚添。我哋見個內灣水淺又無乜魚獲都半信半疑,但見到個師兄早少少已釣緊,咁就去一試啦。又見到有一對男女剛回程,抽住一袋蜆同婆婆傾計,話喺碼頭仔隔離個沙灘掘。

比較似様嘅魚獲

初頭喺碼頭石階邊有一大羣三四寸泥鯭聚集,見水質同泥鯭大細都可以,就換過細鈎細鉛細餌去釣吓,咁又俾我釣到兩條,正諗緊點樣更有效釣泥鯭時,個師兄正釣上一條星鱸,又報料話哩個碼頭黃昏時候就有鱸魚埋岸食魚仔,只要將餌投向碼頭對開幾塊浮木底,鱸魚一係唔食餌,一係就大咬入扣,實無得走,除非斷絲。無耐處長啲竿真係有鱸魚食餌,但可惜斷絲收場。跟住輪到揪哥,見唔係大咬,收上嚟係隻蟹,但最終甩咗。之後又有嘢咬,但唔係鱸魚,係一條坑鰜。

碼頭仔對開嘅浮木底釣鱸魚

見時間都已6:30pm,就諗住走,見師兄有支竿被拉跌,估到非比尋常,果然師兄收上嚟係條唔細嘅鱸魚,師兄話早前仲涼啲時會有成三十人喺個碼頭仔專釣鱸魚,有人一晚可以釣上四十條;今日只花幾個鐘同廿蚊死蝦就釣到三條鱸魚,已十分化算,之後師兄踩住部摺疊單車瀟灑而去。

師兄最後上到條大星鱸

全日扒艇track,逆時針而行

沒有留言 :

發佈留言