2015年3月29日星期日

薯仔種植

種植時間:一月底至三月底
種植方法:發芽薯仔
收成:24個,一斤

種薯仔細個時已玩過,見有啲薯仔發咗芽,阿媽話有毒唔食得,咁咪切咗一嚿有芽嘅種落個盆度,同盆種埋棵番茄添,因為兩樣嘅收成係分别泥上同泥下生,所以無衝突,咁一收就有齊兩樣嚟整番茄薯仔湯喇。當年都唔知啱唔啱時候種,又唔記得種咗幾耐就摷啲泥起啲薯仔,都有一抽好似乒乓波咁大嘅薯仔,好得意架。

第一批收嘅薯仔皮光肉滑,質素唔錯


到上年中租田務農時都無特别要再種薯仔,只應細妹要求種咗一棵佢俾嘅日本番薯,直至今年一月尾落完田例行四圍巡睇吓農友田有乜搞作以作交流之時,見梁生開始種第二批薯仔,見第一批已生得好茂盛,哩批係一個月後。原來梁生都係用我細個種薯仔嘅方法,切咗出芽嘅一嚿落泥種,今次第二批就係切剩再出芽後再次落泥。梁生見我種過薯仔又有興趣就俾咗兩個已出芽嘅薯仔我,原來有兩品種,分别係本地黃肉薯同日本男爵薯,男爵薯無食過,係梁生去北海道旅行時食過好食,買返嚟試種。

梁生俾嘅兩種有芽薯仔切咗四嚿出嚟種,落泥前先抹啲石灰

事不宜遲,即刻返去田攞咗刀切咗兩品種各兩嚿出嚟,再抹啲石灰以防切口爛掉,一字排開種落泥中,切剩嘅薯仔就帶返屋企再行發下一批苗。睇開一個台灣務農blogger有篇講用另一種方法發薯仔苗,好處係無切口,而且棵苗已有根葉,生存率高得多,一試無妨。到二月底就出多四棵苗,又可落田再種。

四棵薯種咗一個月已生出好多葉

就咁過咗一個月到三月頭,第一批四棵薯仔已生得好大,而用新方法發嘅第三批薯仔苗已夠大,剛好啱時候俾細佬種落佢三月可收嘅一塊田中。到三月底因為要清塊田嚟種夏天作物,所以第一批四棵薯仔只種咗兩個月都要收,掘出時先見到有啲細粒薯仔原來露咗出泥,仲已青咗同出芽,見唔食得就留嚟遲啲原粒發苗種囉。有見哩批薯仔皮光肉滑,第二批四棵薯仔就種足三個月,等五月底六月頭就收,希望初夏時唔好落太多雨啦,因為多水薯仔就易爛。

喺屋企用新方法育苗,夠大時好易將棵有根有葉嘅苗由個薯仔分離,只為只有箭咀嘅小小部份連住咋,個薯仔又可用同様方法發唔一批苗

今次收咗第一批薯仔未夠期,如果種多一個月應該有喺街市買嘅薯仔咁大,食得唔好哂,加落煲蓮藕炆排骨度整,又放幾粒飯面蒸熟,食時粉粉綿綿,都幾好食,係唔夠甜。
薯仔係棵植物嘅莖塊,由細細粒漲大而成,有啲莖塊見到光就會變綠,甚至發芽,就會有毒素唔食得啦

第二批收嘅薯仔又未夠期,細細粒放入個網袋又好得意喎

沒有留言 :

發佈留言