2015年2月7日星期六

汀九扒釣日

日期:2015-2-7,農曆十二月十九日,星期六
地點:汀九大橋
開始時間:13:30
結束時間:17:30

有見哩排西水又到石狗季節,連南水散團都嚟熱閙一番,早一局釣到唔錯體型嘅石狗,所以同揪哥、處長商議去汀九租艇仔平平吔專釣吓石狗,前兩星先去探路睇吓環境,今日就成個哩局,原本叫“汀九釣狗日”,但實地一戰有啲差别,請看下文……

三人扒釣半日魚穫


今日天氣係經曆這星期中天泠後回暖後,不算凍但略欠陽光。約咗揪哥同處長12pm喺荃灣西鐵站會合,先去楊屋道街市買咗一斤赤米蝦(後來發覺有部份唔係,處長仲見甩色添……嘩!如果買嚟食仲得掂……),之後食過午飯,大約1:30pm到汀九灘。俾咗$100租咗隻黃艇,由揪哥做扒艇手。

上艇一刻

扒出沙灘少少就試釣一吓先,我第一個落餌,就已感到有魚食,一抽就中,原來係一條紅衫仔,略細過手板,真係估佢唔到。之後再放餌,好快又有魚食,咁又上多條紅衫仔。到第三口餌,今次感覺明顯唔同,一抽就收,收到半水就輕哂,應該係勾得唔夠實,仲諗住連中三元添。無耐到處長支竿彎哂,因為處長今日帶咗揪哥幫大家淘實買嘅兩支1.3m嘅小磯竿(開頭大家都以為係筏仔竿,後嚟得到筏狂指正,我哋原本只係想買批輕竿頭嘅竿一試),見條魚食餌引帶竿頭嘅震動,到收絲時竿嘅弧度,實在過癮。揪哥見咁嘅情況就叫處長先抽高少少支竿再攪,到見到條魚後就手執條絲直接帶條魚上艇,原來係一條良型絲鱲。

處長用支小磯竿上魚,手到拿來

見之後無乜魚訊,揪哥就扒去最近一個泊船浮泡綁上作釣一番,大家都上到少少魚,包括石狗、林哥、紅衫,其中我月揪釣多些林哥,揪哥見啲林哥嘅大細形狀就戲稱佢為USB手指。如是者向外去過幾個浮泡,最遠差唔多去到橋中間個躉位。我哋再無扒再遠去,因為會有大船航行。到5:30pm就扒返沙灘還艇,同另一隻早我哋一步上岸嘅釣友交流一下,佢又係上咗一啲紅衫同石狗。當佢知道我哋原本一心嚟釣石狗,就話之前佢都釣到一大箱,但要去到對岸燈塔位,個艇檔檔主都附和一番,仲推介埋橋躉係另一石狗竇,但要水退先有。咁就下次去哩兩個石狗竇一探。

唔同泊船浮泡

後記:最近同一班釣友講開大家用釣具同參與釣局嘅取向,我就師承揪哥嘅天殘地缺派,慣用經濟實惠貨色。我打趣貼上以下:
我哋釣魚嘅,平有平玩,貴有貴玩
手中無魚,心中有魚……
鮪即是毛,無即是有……
大家明唔明……

全程扒艇track,順時針而行

14 則留言 :

  1. 回覆
    1. 多謝,承你貴言。
      你同日嗰局上兩條紅班,正好多……

      刪除
  2. 你好,請問有沒有四匹艇租㗎

    回覆刪除
    回覆
    1. 有㗎, 好似四百蚊一日.

      刪除
    2. 四匹仔喺邊度租?有無電話呀師兄?

      刪除
    3. 你可以試吓哩個電話
      97579782

      刪除
  3. 請問有無黃艇電話請問有無黃艇電話

    回覆刪除
    回覆
    1. 上星期六去扒釣完, 電話係92224920

      刪除
  4. 回覆
    1. 無抄添, 下次去釣後再通知你呀...

      刪除
  5. 包唔包救生衣?有得租嗎?

    Thanks

    回覆刪除
    回覆
    1. 包救生衣, 唔駛租, 問攞就得.

      刪除